Artizanatet

Artizanatet kanë traditë të gjatë pothuaj në të gjitha qytetet e Kosovës si në: Prizren, Pejë, Gjakovë. Ato dallohen për traditë të pasur, që kanë me punime filigrani, argjendi, bakri, mesingu, argjile, druri etj. Suvenire të këtilla mund të gjenden në dyqanet e shumta të Kosovës.

Përpunimi i drurit nga mjeshtrit kosovarë është bërë për zbukurime në ndërtimtari, në kulmet e shtëpive, objekte fetare, mobile karakteristike, gdhendje zbukuruese në kullat shqiptare etj. Prodhimi dhe gdhendjet prej drurit në instrumentet tradicionale muzikore shqiptare si: çiftelia, lahuta, fyelli, punimi i shtratit të fëmijëve i njohur me emrin “djepi”, prodhuesit e plisit dhe të veshjeve të tjera nacionale, janë pjesë e artit të zejtarëve nga Kosova.

Nga bakri dhe mesingu, zejtarët kosovarë kanë bërë mullirin për bluarjen e kafesë, xhezvet, kutitë e duhanit, etj. Edhe sot e kësaj dite, krijuesit popullor i përkushtohen me vullnet të madh ruajtjes së këtyre traditave. Në fshatrat e Malësisë ende bartet me krenari veshja kombëtare, ndërsa në muzeun kombëtar dhe në muzetë e tjerë në Kosovë, si dhe në galeri të ndryshme, ekspozohen veshje dhe artizanate tradicionale kosovare.